صراط ٹائمز / اسکو علامہ مجلسی نے “بحار الأنوار” (جلد 70، صفحہ 242) میں ذکر کیا ہے۔
“مَنْ أَصْلَحَ بَيْنَهُ وَبَيْنَ اللَّهِ أَصْلَحَ اللَّهُ بَيْنَهُ وَبَيْنَ النَّاسِ”
جو اپنے اور اللہ کے درمیان (تعلق) کو درست کر لے، اللہ اس کے اور لوگوں کے درمیان تعلقات کو درست کر دیتا ہے۔
وضاحت:۔
یہ حدیث امام علیؑ کے گہرے فکری اور روحانی بصیرت کی عکاسی کرتی ہے۔ اس میں یہ سکھایا گیا ہے کہ اگر انسان اپنے خالق کے ساتھ اپنا تعلق مضبوط کر لے، تو اللہ تعالیٰ اس کے دنیاوی معاملات کو بھی سنوار دیتا ہے۔
اہم نکات:۔
اللہ کے ساتھ تعلق کی اہمیت:۔
سب سے پہلا حق، جو انسان پر ہے، وہ اللہ تعالیٰ کا ہے۔ جب بندہ اپنے رب کے حقوق ادا کرتا ہے، یعنی ایمان مضبوط رکھتا ہے، نماز پڑھتا ہے، سچائی اور نیکی پر قائم رہتا ہے، تو اللہ اس کی زندگی کے معاملات کو آسان کر دیتا ہے۔
انسانی تعلقات کی اصلاح:۔
اگر کوئی شخص اپنے دل کو حسد، بغض، اور کینہ سے پاک کر لے اور اللہ کے حکم کے مطابق زندگی گزارے، تو اس کی شخصیت میں ایسی کشش پیدا ہو جاتی ہے کہ لوگ اس سے محبت کرنے لگتے ہیں، اس پر بھروسہ کرنے لگتے ہیں اور اس کے تعلقات بہتر ہو جاتے ہیں۔
روحانی اور دنیاوی کامیابی:۔
اکثر لوگ چاہتے ہیں کہ ان کے رشتے اچھے ہوں، لوگ ان سے محبت کریں اور عزت دیں، لیکن وہ غلط راستے اختیار کرتے ہیں۔ امام علیؑ فرماتے ہیں کہ اگر تم اللہ کے ساتھ اپنے تعلق کو مضبوط کر لو، تو اللہ خود تمہارے معاملات کو بہتر کر دے گا۔