اللہ مستکبرین کو مہلت دے کر رسوا کرتا ہے، مستضعفین کو سربلند کرتا ہے
قم/تہران (خصوصی رپورٹ)
معروف اسلامی مفکر اور بزرگ عالمِ دین آیت اللہ حائری شیرازیؒ کے ایک گہرے اور بصیرت افروز بیان نے ایک بار پھر اہلِ فکر کو جھنجھوڑ کر رکھ دیا ہے، جس میں انہوں نے تاریخ، سماج اور الٰہی سنت کے ایک اٹل قانون کی وضاحت کی ہے۔
آیت اللہ حائری شیرازیؒ کے مطابق اللہ تعالیٰ متکبر اور مستکبر انسان کو فوراً نہیں گراتا بلکہ پہلے اسے مہلت دیتا ہے۔ یہ مہلت درحقیقت نجات کے لیے نہیں بلکہ عبرت اور رسوائی کے لیے ہوتی ہے۔ متکبر کو وقتی طور پر اقتدار، طاقت اور غلبہ عطا کیا جاتا ہے، یہاں تک کہ وہ شہروں، وسائل اور انسانوں پر تسلط جمانے لگتا ہے، اور کمزور طبقات دفاعی حیثیت میں چلے جاتے ہیں۔
ان کے بقول یہ بلندی اس لیے نہیں ہوتی کہ متکبر بچ جائے، بلکہ اس لیے ہوتی ہے کہ جب وہ گرے تو اس کے گرنے کی آواز پوری دنیا سنے۔ اگر وہ ابتدا ہی میں گرا دیا جاتا تو نہ اس کا زوال نمایاں ہوتا اور نہ ہی حقیقت دنیا پر آشکار ہوتی۔
آیت اللہ حائری شیرازیؒ نے اس عمل کو بت سازی اور بت شکنی سے تعبیر کرتے ہوئے فرمایا کہ اللہ پہلے متکبر کو ایک بت بننے دیتا ہے، تاکہ لوگ اس کے سامنے جھکیں، اس سے مرعوب ہوں، اور اسے ناقابلِ شکست سمجھیں، پھر وہی خدا اس بت کو توڑ دیتا ہے تاکہ دنیا جان لے کہ بت ٹوٹتے بھی ہیں، اور ضرور ٹوٹتے ہیں۔
انہوں نے واضح کیا کہ یہ تخلیق اور تاریخ کا اٹل قانون ہے کہ مستضعفین کا آخرکار سربلند ہونا یقینی ہے اور مستکبرین کا انجام پستی اور سقوط کے سوا کچھ نہیں
یہ فکر انگیز کلمات آج کے عالمی حالات، طاقت کے نشے میں مبتلا نظاموں اور مظلوم اقوام کے حالات پر گہری روشنی ڈالتے ہیں، اور اہلِ ایمان کو صبر، بصیرت اور امید کا پیغام دیتے ہیں۔